SON DƏQİQƏ: İsrail mətbuatından diqqətçəkən təhlil: Yeni səhifə açıldı

Müdafiə Sənayesində Böyük Sıçrayış: Türkiyənin Regional Rolu Güclənir

İsrailin aparıcı xəbər saytlarından olan Mako, Türkiyənin müdafiə sənayesində son dövrlərdə əldə etdiyi nailiyyətləri ətraflı şəkildə işıqlandırdı. Shai Levi tərəfindən qələmə alınan xəbərdə, Türkiyənin Misirdə Qəzza atəşkəs razılaşmasına vasitəçilik edən ölkələr sırasına qoşulması ilə yanaşı, hərbi potensialını artırmaq səylərini əzmlə davam etdirdiyi qeyd olundu.

Pilotsuz Döyüş Təyyarəsi QIZILELMA Əməliyyat Yetkinliyinə Doğru

Xəbərdə Baykar tərəfindən milli və orijinal şəkildə inkişaf etdirilən Türkiyənin ilk pilotsuz döyüş təyyarəsi Bayraktar KIZILELMA-nın əməliyyat yetkinliyinə bir addım daha yaxınlaşdığı bildirilir. Sentyabr və oktyabr aylarında həyata keçirilən sınaqlarda KIZILELMA-nın yerli istehsal olan döyüş sursatları ilə uğurlu uçuşlar etdiyi qeyd edildi. Bu sınaqların hava-yer sursatlarının sistemə inteqrasiyasını və gələcək real atəş sınaqları öncəsi nəzarət mexanizmlərinin uyğunluğunu qiymətləndirməyə xidmət etdiyi vurğulandı.

KAAN İlə Regional Liderlik Hədəfi

Xəbərdə Türkiyə tərəfindən milli imkanlarla dizayn edilən, inkişaf etdirilən və istehsal olunan milli döyüş təyyarəsi KAAN ilə KIZILELMA-nın inteqrasiyalı şəkildə fəaliyyət göstərməsinin planlaşdırıldığına diqqət çəkildi. Bu konsepsiya Türk Hava Qüvvələrinə həm insanlı, həm də pilotsuz platformaları koordinasiyalı şəkildə istifadə etmək bacarığı qazandıracaq. Mako-ya görə, əgər Türkiyə bu sistemləri uğurla inteqrasiya edə bilərsə, həm beşinci nəsil döyüş təyyarəsi, həm də gizli hücum PUA-sı inkişaf etdirən azsaylı ölkələrdən biri olacaq. Bu səviyyəyə indiyədək yalnız ABŞ və Avstraliya yaxınlaşa bilib ki, bu, Türkiyənin müdafiə sənayesinin əldə etdiyi mühüm nailiyyətdir.

Tam Müstəqillik Yolunda Mühüm Addımlar

Mütəxəssislər, bu addımların Ankaranın müdafiə sahəsində tam müstəqillik hədəfinin bir hissəsi olduğunu vurğulayırlar. Xəbərdə “Türkiyənin F-35 proqramından çıxarılmasına baxmayaraq, hərbi potensialını sürətlə inkişaf etdirməsi diqqət çəkir” ifadələrinə yer verilib. Eyni zamanda, Türkiyə Prezidenti Rəcəb Tayyib Ərdoğan və ABŞ Prezidenti Donald Tramp arasında son təmasların, Türkiyənin yenidən F-35 proqramına daxil edilməsinə yönəlik mümkün bir razılaşmaya qapı aça biləcəyi irəli sürülüb.

Dəniz Müdafiəsində Yeni Səhifə: GÖKSUR

Mako-nun xəbərində yer alan digər mühüm detal, Türkiyənin dəniz müdafiəsi sahəsində qazandığı uğurlar oldu. Türk müdafiə sənayesinin aparıcı qurumlarından ASELSAN-ın tamamilə yerli imkanlarla inkişaf etdirilən GÖKSUR hava hücumundan müdafiə sisteminin ilk real atəş sınağını uğurla başa vurduğu və bu sahədə “yeni bir səhifə açıldığı” ifadə edildi.

Qaradeniz sahillərində keçirilən sınaqda, sistemin alçaq hündürlükdə hərəkət edən hədəfi dəqiq nişan alaraq vurduğu bildirildi. Mako-ya görə, bu uğur Türkiyənin hava müdafiə texnologiyalarında çatdığı yetkinlik səviyyəsini ortaya qoyur.

Regional Dinamikalar Yenidən Yazılacaq

Xəbərdə əlavə olaraq, GÖKSUR sisteminin qısa müddətdə Türk Hərbi Dəniz Qüvvələrinin müdafiə şəbəkəsinə inteqrasiya edilməsinin gözlənildiyi və bunun çoxqatlı müdafiə strategiyasının əhəmiyyətli bir hissəsi olacağı vurğulandı. Mütəxəssislər, bu inkişafların Türkiyənin Aralıq və Qaradənizdəki strateji mövqeyini gücləndirəcəyini və regional təhlükəsizlik dinamikalarını “yenidən yaza biləcəyini” ifadə edirlər. Bu irəliləyişlər hərbi potensialını daha da artıracaq və Türkiyənin bölgədəki təsirini genişləndirəcək.

24 saat