EuroLeague-dən İsrail qərarı Türkiyə klublarını narahat etdi

Makkabinin tələbinə möhlət verildi

İsrail klubu Makkabi Tel-Əviv ev oyunlarına daha tez qayıtmaq istəyirdi. Klub, oktyabrın 30-da keçiriləcək Qızılyıldız matçının Tel-Əvivdəki Menora Mivtachim Arenada baş tutmasını arzulayırdı. Lakin Avroliqa Kommersiya Aktivləri üzvləri və digər klublar təhlükəsizlik vəziyyətinin daha da aydınlaşması üçün prosesin dekabr ayına qədər təxirə salınmasına qərar verdilər.

Tərəflər arasında əldə olunan razılığa əsasən, İsraildəki Avroliqa matçları dekabrın 1-də yenidən başlayacaq.

Klublardan etiraz olmadı

Qərarın qəbul edilməsində heç bir klubun etiraz etmədiyi və bütün üzvlərin yekdil fikirdə olduğu bildirilib. Rəsmi səsvermə keçirilməsə də, qərarın yekdilliklə qəbul edildiyi qeyd olunub.

Avroliqa rəhbərliyi İsrail klublarının matçlarına yenidən ev sahibliyi etməsinə razılıq verərkən, bölgədəki təhlükəsizlik şəraitinin davamlı olaraq izləniləcəyini vurğulayıb. Prosesin, xüsusilə də Qəzzada atəşkəsin davamlılığı və bütün tərəflər üçün təhlükəsiz bir mühitin yaradılması şərtinə bağlı olduğu ifadə edilib.

Türkiyəyə gəlməyəcəklər

Qərardan sonra İsrailin komandaları, Türkiyənin Fenerbahçe Beko və Anadolu Efes komandaları ilə oynanılacaq matçlar üçün Türkiyəyə gəlməyəcək. Sözügedən matçların Avropanın müəyyən bölgələrində oynanılmağa davam edəcəyi öyrənilib. Türkiyə təmsilçiləri isə alınan bu qərara əsasən İsrail komandaları ilə öz ölkələrində qarşılaşacaq. Bu vəziyyət idmansevərlər tərəfindən tənqidlə qarşılanıb.

İsrail komandalarının Türkiyəyə gəlməməsi qərarı basketbol azarkeşləri arasında müxtəlif reaksiyalara səbəb olub. Bəziləri bu qərarı təhlükəsizliklə əlaqələndirərək anlayışla qarşılayır, digərləri isə idman prinsiplərinə zidd hesab edərək tənqid edir.

Üç İsrail təmsilçisi öz salonuna dönəcək

Bu qərardan sonra Makkabi Tel-Əviv və Hapoel IBI Tel-Əviv, Avroliqa matçlarını yenidən Tel-Əvivdəki salonlarında oynaya biləcək.

Həmçinin Hapoel Bank Yahav Jerusalem də BKT Avrokubok matçlarını Pais Arena Jerusalemdə keçirməyə yenidən başlayacaq.

24 saat